Dj Tubet

fonte: Messaggero Veneto

04 gennaio 2011 — pagina 18 sezione: Udine

di DJ TUBET

La idee di doprâ il rap tant che protesi artistiche par fâ une lezion o une ativitât laboratoriâl e risulte jessi cumò un percors dal dut pioneristic. Cui che al scrîf – stant aes informazions cjapadis sù – al varès di jessi un tra i prins sperimentatôrs di cheste teorie. La idee e je nassude sot la forme embrionâl di laboratoris in lenghe furlane e des ativitâts di tirocini te universitât, in gracie des laureis otignudis in psicologjie socio-culturâl e siencis de educazion, e in curt ancje in Siencis de formazion. Fasint jeve su la esperience personâl intal cjamp de improvisazion di rimis (freestyle) o ai pensât a une ativitât di laboratori rap, che al permeti di integrâ sedi la ativitât didatiche sedi la comunicazion in aule, e al sedi plui dongje a une poesie/zûc di peraulis che no a un normâl rap. Fin cumò l’ûs dal rap al è stât sperimentât in diviers contescj educatîfs: analisi dal lengaç poetic, te scuele primarie; insegnament de lenghe furlane, cuntun cors di perfezionament par insegnants e laboratoris in aule; viaç dentri te lenghe e te leterature furlane, cuntun spetacul promovût in 15 scuelis mezanis e superiôrs de regjon cun Zani, Moretti, Kersevan, A.Veliscig e G. Veliscig, par cont de Arlef; bulisim, dentri di une ricercje-azion sul bulisim pal ambit distretuâl nord 6.4 di Pordenon; integrazion e multiculture; difusion dal valôr dal sparagn, cu la cuinte zornade regjonâl dal sparagn par cure de Bancje popolâr di Cividât; laboratoris cun fantats disabii, cuntun video musicâl di une cjançon sul teme de aghe. Midiant il furlan dut il progjet al assum ancje une valence culturâl finalizade a fâ cognossi lis potenzialitâts de lenghe furlane e de sô musicalitât, permetint di discuvierzi la pussibilitât di zuiâ cui sunôrs, la vôs e la lenghe furlane e cirint di eliminâ ogni forme prejudiziâl su la marilenghe e il so ûs. Lis scuelis in gjenerâl si spietin une lezion divierse che e sepi cjapâ dentri dute la classe par otignî une cjançon di podê fâ scoltâ intune esibizion scolastiche; in altris câs, invezit, la produzion musicâl e je une sorte di scuse par lavorâ in altris cjamps tant che par esempli il bulisim, la integrazion o la educazion ae multiculture. I students a ricognossin cui che al pues jessi in cualchi mût plui dongje dal lôr mont, e il fat di lavorâ cun lôr al cree une impuartante vierzidure e un bon dialic. Otignî une cjançon partint dai elaborâts e des ideis gresis dai fantats al favorìs un stîl educatîf basât su la autorevolece, che e consist inte ricercje comune di une soluzion in stât di sodisfâ dutis dôs lis parts, favorint la educazion ae democrazie inte otiche di Gordon ma ancje di Rogers. Intal procès di creazion de cjançon doprant ancje parts di test intes lenghis di divignince dai stranîrs si rive a creâ un sintiment di integrazion basât sul zûc e su la curiositât che il confront tra lenghis e sonoritâts diviersis al sa dismovi. Jentrâ in classe cuntune consolle di dj o inte prime part dal laboratori cuntun zirediscs e cualchi vinîl al permet di facilitâ la comprension di cualchi teme teoric musicâl, ma ancje di fâ un puint tra il presint e il passât, che al inricjìs une vore la esplicazion storiche/musicâl fate tant che introduzion al laboratori. L’ûs contemporani di plui lengaçs dulà che la musiche e lis lenghis si fondin une cun chês altris, al cree tra i students tante motivazion e ricetivitât, che l’aprendiment de lenghe, dal metodi par creâ une cjançon, o de tematiche che si vûl analizâ, si disvilupe in maniere cuasi dal dut naturâl. Analizâ une culture di zovins come l’hip hop al ufrìs ispirazions dispès impuartantis par fevelâ di emigrazion, di rispiet e di multiculture. Une culture zovine e nas duncje de misture creative di plui culturis, di plui convivialitâts e e je duncje un metafore otime par significâ la acetazion. E no vin di dismenteâsi che, in proporzion, a domandâ di fâ furlan a scuele a son plui i stranîrs che no i fantats di provignince taliane.